CRM i personalizuar

CRM-të e gatshme e detyrojnë ekipin tënd të ndjekë procesin e dikujt tjetër. Një CRM i personalizuar kushton më shumë në fillim dhe më pak çdo muaj më pas, sepse nuk paguan për çdo përdorues, as për fusha që nuk plotësohen kurrë.

Për kë është

Për ekipe shitjesh dhe shërbimi që e kanë kaluar fazën e Excel-it, por që nuk ndihen mirë në një CRM të madh ndërkombëtar. Shenjat janë të njohura: të dhënat e klientëve janë të shpërndara në tabela, email dhe WhatsApp; menaxheri nuk e di sa marrëveshje janë realisht të hapura; dhe licencat e CRM-së aktuale paguhen për module që nuk i hap askush.

Pse një CRM i personalizuar

Sepse procesi yt i shitjes është avantazh, jo gabim që duhet korrigjuar. Nëse shet me oferta që kalojnë nga tre miratime, me kontrata vjetore që rinovohen ose përmes agjentëve në terren, sistemi duhet të ndjekë pikërisht këtë rrjedhë. Ndërtoj vetëm fazat, fushat dhe raportet që ekipi yt përdor, dhe asgjë tjetër. Kodi dhe të dhënat janë të tuat, pa u lidhur pas një shitësi.

Ky lloj sistemi lidhet edhe me pjesën tjetër të biznesit: emailet dhe mesazhet e WhatsApp-it bashkëngjiten automatikisht te kontakti, ofertat dalin në PDF me një klik, dhe raportet i tregojnë menaxherit saktë ku ngec shitja, pa pasur nevojë të mbledhë tabela nga secili agjent.

Si ecën një projekt

Analizë. Ulem me njerëzit që do ta përdorin çdo ditë — shitjen, suportin, pronarin — dhe hartëzoj si ecën një klient nga kontakti i parë deri te fatura.

Ndërtim. Punoj në cikle të shkurtra. Pas dy-tre javësh ekipi e provon me të dhëna reale, dhe komentet e tyre formësojnë pjesën tjetër.

Lançim. Importoj të dhënat nga Excel ose nga CRM-ja e vjetër, i pastroj nga dublikatat dhe trajnoj ekipin.

Mbështetje. Pas lançimit lindin gjithmonë kërkesa të reja. Mund të vazhdojmë me mirëmbajtje mujore ose me përmirësime të veçanta.

Kosto dhe afati

Një CRM i personalizuar zgjat zakonisht 5–10 javë. Afati varet nga numri i roleve, nga integrimet (email, WhatsApp, fatura, kontabilitet) dhe nga sasia e të dhënave për migrim. Pas bisedës së parë të dërgoj një ofertë me fazat dhe koston e secilës.

Pyetje të shpeshta

A e humbim historinë nga sistemi aktual?

Jo. Kontaktet, marrëveshjet dhe shënimet migrohen, dhe para lançimit i kontrollojmë bashkë.

A funksionon në telefon?

Po. Ndërfaqja është responsive, që agjentët në terren t'i regjistrojnë takimet që nga vendi.

Po sikur procesi ynë të ndryshojë pas një viti?

Pikërisht për këtë vlen një sistem i personalizuar. Fazat dhe fushat e reja shtohen pa pritur roadmap-in e dikujt tjetër.